نصايح أستاذي للتحضير لإمتحان الثانوية العامة
Monday 10 October 2022

فى المرحلة الثانوية كنت باخد دروس خصوصية فى كل المواد الأساسية تقريبا، وكان فيهم استاذ لغة عربية فضله عليا كبير فى تحضيري نفسيا للإمتحان، مش بس أمتحان اللغة العربية لكن كل المواد وبعدها فى الكلية، كان أستاذى بيقوم بتحضير الطلبة بعمل درس مخصوص لإيه يتعمل قبل وخلال الامتحان، نصايح يمكن تبان بديهية وبسيطة لكن حقيقى كان تأثيرها كبير، حتي وبعد اكتر من 15 سنة لسة بفتكر الدرس ده وبطبق اللى فيه، حبيت اقيد الملاحظات والنصايح دي لعلها تكون مفيدة لحد غيري داخل على امتحان، اي امتحان:

الأدوات المطلوبة للإمتحان:

  • أعرف اكتر قلم بيريحك فى الكتابة وهات منه رقم اكبر من اللى محتاجه، 6 اقلام جاف مثلا، الامتحان كله كتابة ومحتاج تكون مرتاح مع القلم اللى هتستخدمه، ومش كويس انك تكون عندك هاجس ان القلم هيخلص وسط الامتحان او انه يبوظ وماتلاقيش غيره، وهات اكتر من 2 لأن احتمال كبير تتسأل على قلم زيادة من زميل، واحتمال وسط الامتحان القلم يخلص، ف6 مثلا كفاية ليك ولكل الاحتمالات وهيشيل من دماغك اي هاجس ليه علاقة بالقلم. بعد سنين لسة بسمع عن ناس بتفتكر وقت امتحاناتها وبيجيلها كوابيس ان القلم خلص ومش عارفين يجاوبوا، دي مش حاجة قليلة ومش خسارة فى امتحان مهم.
  • هات ادوات جديدة مع اول امتحان، وهات الدبل فى الحاجات اللى بتستهلك، الأستيكة مثلا، مسطرة جديدة و30سم، اتأكد ان الالة الحاسبة شغالة ولو فيها مشاكل هات واحدة زيها جديدة علشان تكون متعود عليها.
  • البس هدوم مريحة فيه امتحانات بتمتد ل3 او 4 ساعات مش عاوز تكون قاعد متضايق علشان الجزمة دي شكلها حلو بس ضيقة عليك، او البنطلون مش مريح، محتاج تكون فى اكتر حالة مرتاح فيها وانت بتمتحن ودي حاجة فى ايديك من قبل الامتحان

قبل الامتحان:

  • راجع بسرعة ليلة الامتحان على ملاحظات بسيطة، المفروض طول السنة بتذاكر، لو حاولت تذاكر كل حاجة ليلة الامتحان ممكن تلخبط نفسك او الوقت يكون ضيق فمتكملش وتضايق نفسك على الفاضي، ذاكر بس شوية ملاحظات بسيطة وماتحاولش تغطي المنهج كله.
  • نام بدري اكتر من اللى متعود عليه واصحي بدري، وافطر فطار كويس، محتاج مودك يكون حلو، كل حاجة بتحبها وماتتقلش فى الأكل.
  • اوصل قبل الامتحان بوقت مناسب، مش كتير زي ساعة ولا قليل زي 5 دقايق، نص ساعة مثلا كويس علشان ماتحسش انك فى الطريق هتتأخر ولا تحس انك هتوصل تقعد ساعة، ده هيقلل التوتر شوية لأنك عارف ان الامتحان عليه لسة وقت كبير، لحد دلوقتي فيه ناس بيجيلها كوابيس انها راح عليها نومة وراحت متأخر، دي حاجة بسيطة وفى ايدك بغض النظر ايه هو الامتحان.
  • لما توصل فيه ناس بتقعد تتكلم وتهزر او تراجع مع بعض او تسأل بعض عن ايه ممكن يكون فى الامتحان، مالكش دعوة بالكلام ده، محتاج تقعد فى مكان هادي على ما بوابة الامتحان تفتح، ماتذاكرش او تراجع او تدخل فى مهاترات، حافظ على هدوئك واستعدادك.
  • محتاج تقلل التوتر او الرهبة على قد ماتقدر، ماتعملش اي حاجة تضايقك قبل الامتحان، مثلا سيب الموبايل ماتدخلش على الفيسبوك او تويتر علشان ماتتشغلش فى موضوع يضايقك او تريند يشغلك.
  • قلل المفاجأت، يعني لو معتمد على اتوبيس علشان تروح الامتحان مثلا وساعات بيجي متأخر خد اليوم ده تاكسى

فى الامتحان:

  • خليك فى ورقتك وركز فى اجاباتك، مش هتاخد درجات زيادة لما تساعد زميلك، ركز فى هدوئك واجاباتك
  • لو جاوبت سؤال بسرعة بعد ماقريته وبعدين وانت بتراجع حسيت انك مش متأكد وهتغير الاجابة راجع نفسك تاني، عادة الاجابة الاولى هي الصح.
  • لو فيه سؤال حاسس انك عارف اجابه بس مش جاية على بالك دلوقتي، كل لما تحاول تفتكر كل لما يكون اصعب انك تفتكر، روح على السؤال اللى بعده وسيب اجابة ده دلوقتي، قدام ممكن تفتكر الاجابة ده غير انك هتوفر وقت اللى بتحاول تعصر فيه مخك علشان يفتكر
  • جاوب اللى تعرفه وسيب مساحة للى مش عارفه، لو ماعرفتش الاجابة فى الاخر حاول تجاول بأكتر اجابة محتملة بحسب مذاكرتك، ماتسيبش اجابة فاضية.
  • خلى ساعة ايدك قدامك واعرف كل سؤال محتاج ياخد وقت قد ايه علشان الوقت مايسرقكش فى سؤال كبير.
  • كبر خطك بحيث يكون مقروء لغيرك، الخط الصغير والغير واضح ممكن يخلى اجابتك الصح غير مقروءة وبالتالي ماتاخدش درجتها
  • جاوب كل سؤال فى صفحة، اقرا السؤال الاول وبعدين اعمل فريم للصفحة ده هيديلك مساحة تفكر فى السؤال او تستعيد الحتة اللى ذاكرتها وانت بتسطر.
  • لو هتشطب على كلمة اشطب بخط او خطين بس، الصفحة المفروض يكون شكلها نضيف للى بيصحح والشطب بيبوظ الشكل.

شكرا:

أخيرا شكرا لأستاذي أستاذ محمود سأسأ على مجهوده وعلى النصايح والنظام اللى قدمه ليا ولغيرى فى وقت التعليم فيه كان عشوائى وغير جدي، وجوده كان نقطة نظام واحترافية وهدوء، أشكرك وأتمنى ليك كل خير.

Backlinks